A otorga 4000 tereno erfpacht pa construi cas y te awor no tin nada construi

Dit item is gearchiveerd op 16-02-2020.

ORANJESTAD - Departamento di Infrastructura y Planning (DIP) ta calcula cu tin alrededor di 4000 tereno erfpacht bashi cu a otorga pa construi cas y te awe no tin nada construi riba nan.

DIP lo bay cuminsa actua riba esnan cu tin tereno erfpacht bashi

Pa loke ta trata tereno pa famia construi un cas, e proceso a cuminsa na mei 2018, y esaki ta bayendo bon. Awor DIP ta monitor e diferente fase cu a pasa caba. Cu e ultimo conteo di november 2019, tin un total di 185 akte pasa, y 220 persona cu ta sperando riba notario. DIP ta preparando e siguiente pre-reservering y reservering nan cu mester sali pronto. Por bisa cu tur cos ta bayendo bon manera cu a planea.

Na e momentonan aki DIP ta procesa e atraso di aña 2013, y e meta ta pa yega te cu 2018 prome cu aña 2020 termina. E situacion fastioso cu ta encontra, ta e cantidad limita di tereno pa construi cas. Esaki ta nifica, cu DIP mester bay analisa segun un calculo, cuanto tereno por otorga duna pa e proximo 5 aña.

Pa loke ta e problema di scarsedad di tereno, tin diferente manera cu nos por atendecu easki. Den pasado tin personanan cu a haya un tereno otorga y nunca a construi riba dje. Esaki lo ta un di e prome accionnan na unda cu DIP ta bay cuminsa actua riba, kiermen esnan cu tin tereno erfpacht bashi. DIP ta haci un suplica pa nan cuminsa construi riba nan tereno.

Aña pasa DIP a manda carta na varios persona cu no ta cumpliendo cu ley, kiermen, cu tin tereno erfpacht bashi y no ta haci nada pa construi riba esaki, y cu país Aruba lo tuma e tereno otorga bek. DIP ta calcula cu tin alredor di 4000 tereno erfpacht bashi cu a otorga pa contrui cas.

E otro problema cu DIP a constata ta, cu tin un gran cantidad di cas bandona y bashi rond di nos isla. DIP kier yega na un acuerdo cu e doño di cas pa wak con por intermedia pa soluciona e situacion. DIP ta consciente cu den nos “Landsverordering Uitgifte Eigendommen” ta stipula cu si bo cas ta bandona y bo no ta haciendo nada cune, pais Aruba tin e derecho pa cuminsa un proceso pa kita e tereno.

Por ultimo, DIP ta bezig cu varios verkavelingsplan y ta evaluando e mihor forma pa hinca esaki den otro, teniendo na cuenta e peticion di Minister pa evalua construccion bay halto, cu por tin como consecuencia cu e verkavelingsplan por bira mas chikito. Pues e lo encera contruccion cu ta pa bay halto na unda cu e famia lo biba abou y drumi ariba. Tur esaki lo por contribui cu DIP por yega na verkavelingsplan mas chikito, p’asina por construi mas cas.

Pa loke ta e cifra di esnan cu a ricibi un pre-reservering caba, DIP mester warda riba e personanan cu a ricibi un pre-reservering, pa nan cumpli cu e varios rekisito, prome cu DIP por anuncia cuanto hende lo ricibi un reservering. E famianan cu no ta logra cumpli cu e rekisitonan stipula, DIP tin un acuerdo cu FCCA cu tin e tarea pa construi 250 cas pa esnan cu no ta yega na remarka.

Esaki ta un di e proyectonan cu DIP ta trahando conhuntamente cu FCCA pa evalua con tur cos ta bayendo cu e proyecto. Un cos cu nos sa, cu Aruba tin un scarsedad di tereno. E otro forma pa ricibi mas tereno ta, ta esnan cu tin tereno propio “eigendom” por bende esaki na esnan interesa pa cumpra un pida tereno. Tur e formanan aki por yuda pa un famia ocupa un tereno y cuminsa construi nan hogar.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options