E edificio ta diseña pa Ir. Joel Croes y construi pa BIC/Thiel Corporation. MFA Paradera ta situa na otro banda di caminda dilanti di e ex-Hulpbestuurskantoor Paradera.
E MFA Paradera ta destina pa trece e servicionan di gobierno mas cerca di e pueblo di Paradera. E lo ta habri tambe den oranan di anochi, sirbiendo como e luga unda e diferente organisacionnan di bario manera: gruponan di iglesia, gruponan social y gruponan educativo por reuni.
Sr. Elton Hart, manager di e MFA, a institui un comision di bario yama ‘Bos di Paradera’ cual comision su meta ta pa mantene contact cu e habitantenan dje bario.
E hulpbetruuskantoor Paradera, y un cafeteria , ta loke ta hubica den e edificio MFA. Ademas Departamento di Impuesto tambe ta brinda e siguiente servicionan den MFA Paradera:
- Pago di impuesto
- Pago di permiso di DIMAS
- Registracion di auto y brommer
E orario ta di 08:00 ‘or di mainta te cu 15:00 ‘or . No ta cera merdia.
E edificio su nomber ta ‘Cas di Mito’ na honor di dr. Antonito Gordiano (Mito) Croes, un conocido politico Arubano, sabio y estadista. El a fayece dia 7 di augustus 2016 na Aruba, e tawata tin 70 aña di edad.
E invitadonan y habitantenan di bario tawata tin e oportunidad pa admira e precioso y specialmente edificio funcional.
Share this page