Declaracion di “inkomstenbelasting” 2015 a sali

E formulario, conoci tambe como aangiftebiljet, ta pa tur persona residencia na Aruba. Pa yena e formulario, e persona mester haci uzo di diferente documento tocante entrada y gasto durante 2015, manera salario anual, pension di trabou, pension di biehes, pension di viudo of pension di huerfano, entrada di huur di propiedad, entrada di “side-job”, carta di interes di banco y/of otro instituto financiero, seguro di bida, comprobante di donacionnan haci, comprobante di gastonan di scol di yiu cu ta studia den exterior etc.

Den caso di un empresa propio (eenmanszaak), ta pidi e tur doño pa prepara nan relato anual y si nan no por hacie, pa busca un consehero.

Dia prome di december proximo ta e ultimo dia pa entrega e formulario original completamente yena na Departamento di Impuesto. Ta pidi tur hende pa trece un copia di e formulario p’asina bo por haya un stempel cu ta comproba e fecha di entrega.

Ta un obligacion legal pa yena y entrega e formulario di declaracion inkomstenstenbelasting. Den caso cu no cumpli, e persona por haya un boet di 5% di e suma di belasting  cu ta minimo AWG. 250,- y maximo AWG. 10..000,-.

Pa medio di e declaracion, e cliente ta haya e oportunidad pa haci uzo di su derecho di deduci su gastonan.