DIP ta enfatisa cu tur tereno otorga mester uza segun nan meta conforme ley

Dit item is gearchiveerd op 13-02-2020.

ORANJESTAD-Departamento di Infrastructura y Planning ta haciendo varios control riba nos isla pa loke ta uzo di tereno otorga.

Nan ta controla varios caso, entre otro, casnan den Colony, kioskonan, garage den bario, vivienda ilegal riba tereno destina pa plantacion. Tur control ta tuma luga cu cooperacion cu Cuerpo Policial. Nan a haya varios situacion cu den pasado a tolera.  Door cu a tolera e situacion aki pa varios aña e la bira algo normal den comunidad. Por ehempel, tin un caso unda un persona tin un tereno destina pa plantacion, pero ora DIP controla ta haya 8 pa 10 cas riba e tereno unda e personanan ta paga huur of coriente. Esaki ta contra e meta cu e tereno ta destina pe.

Segun regla, DIP ta manda e persona aki un carta. Den e carta ta specifica e iregularidad cu ta tumando luga. Tambe si un persona tin un tereno y e no ta paga, lo kita esaki segun ley. DIP no ta para responsabel pa ningun iregularidad den caso cu tin persona ta biba riba un tereno destina pa plantacion y tin un combenio cu e doño mes di e tereno.

DIP ta recorda y urgi tur persona cu a tin un tereno pa plantacion, pa uz’e pa e meta aki y no pone cas, negoshi y nada ilegal riba e tereno.

DIP a ricibi varios keho pa motibo cu e personanan cu ta uza e tereno pa plantacion, no tin cas. Na momento cu DIP controla, ta  topa cu personanan cu ta habita e casnan cu no ta inscribi nan Aruba. Varios di nan ta ilegal. Den e caso aki, DIP mester invulcra otro departamento pa presenta na e sitio, considerando e aspecto humano. DIP ta tuma e aspecto humano den consideracion prome cu actua y no ta desaloha di biaha.  Alabes ta pidi conseho na Departamento di Asunto Social y algun departamento relaciona cu e situacion cu a presenta. DIP su meta principal ta mantene orden y aplica ley y ta duna e cada persona e tempo necesario conforme ley pa busca otro hogar. Na final, e doño mester kita tur cos riba tereno y mantene esaki pa plantacion of segun e meta cu a otorga esaki.

Un di e problemanan grandi cu DIP ta enfrenta ta cu pueblo mester comprende, cu no ta pasobra a tolera e situacionnan aki, mester sigui tolera y cosnan mester keda asina. Awor tin un maneho nobo y DIP ta percura pa tin orden. Si a otorga bo un tereno pa traha cas, pa negoshi of plantacion, segun ley bo mester cumpli cu esaki. Den bo contract ta para bon cla kico por y kico no por.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options