Expo Labor 2017 ta tuma luga un biaha mas

Expo Labor ta tuma luga di 9.00 or di mainta te cu 07.00 or di anochi den Renaissance Convention Center. 

E evento aki ta pa uni trahadonan, desempleadonan y doñonan di trabou bou un solo dak. Sea esunnan cu ta buscando trabou, esunnan cu ta busca bon trahado of simplemente esunnan cu kier expande nan conocemento y haya mas herment pa nan por crece profesionalmente den nan trabou actual.

E aña aki lo tin entre 30 cu 40 companianan presente cu lo duna informacion tocante nan vacatura di trabou. Dunado di trabou por papia cu buscado di trabou pa haci un cita di trabou of hasta por yega na un match.

Lo tin un seccion cu departamentonan di servicio manera, Aruba Human Resources Association (AHRA), Departamento pa Progreso Laboral (DPL), Directie Arbeid en Onderzoek (DAO), IDEA y Dienst Technische Inspectie (DTI) entre otro, cu lo t’ey pa duna informacion valioso, contesta tur pregunta, crea of actualisa nan curriculum y pa yuda tur participante yega mas cerca na obtene un trabou ideal of haya un trahado ideal.

Ademas, lo tin un otro seccion cu companianan cu ta duna curso, training y varios otro les pa esunnan cu kier expande nan conocemento riba diferente tereno y crece den e ambito profesional. Sin laga afo, e sala di charla unda cu expertonan y ‘entrepreneurs’ lo inspira, motiva y cubri un variedad di tema cu esencial pa ta exitoso den e mercado laboral di awendia.

Pa registrana e tayer of charlanan of mas informacion tocante companianan cu lo ta presente y con pa participa na Expo Labor 2017, bishita e pagina di facebook:
Expo Labor Aruba of manda un e mail na expolaboraruba@gmail.com .