Segun e Decreto Nacional fecha 28 di augustus, 2017, No.1, No. DWJZ/1103/17 y e Disposicion Ministerial fecha 31 di augustus 2017, DWJZ No.1104/17 di Minister di Asunto General, ta prohibi pa bende of entrega bibida alcoholico na publico for di diahuebs 21 di september for di 6 or di atardi te cu diasabra 23 di september 6 or di mainta.
Segun e Decreto Nacional menciona tiendanan of supermercadonan unda ta bende productonan di alcohol, mag keda habri pero cu e condicion cu no mag di bende of entrega e productonan menciona na publico.
Hotel y luga di alohamento tambe por keda habri pero por bende y entrega bibida alcoholico solamente na nan huespednan cu no ta hende local. Restaurant tambe por keda habri, pero cu e condicion cu no mag di bende of entrega e productonan menciona na publico, cu excepcion di restaurant na Aeropuerto Internacional Reina Beatrix, unda unicamente por bende of entrega bibida alcoholico na pasaheronan cu ta saliendo for di Aruba of pasaheronan di transito.
Refresqueria y snackbar tambe por keda habri, pero no mag di bende ni entrega alcohol.
Otro medida, manera stipula den Disposicion Ministerial fecha 31 di augustus 2017, DWJZ No. 1133/17 di Minister di Asunto General, ta cu riba dia di eleccion, 22 di september 2017 for di 6 or di mainta te cu 8 or di anochi ta prohibi di uza ekipo di zonido dentro di un distancia di cincuenta metro di un stembureau. Tampoco no mag di haci anuncio politico of pone musica den bisindario di un stembureau.
Cuerpo Policial lo controla debidamente si tur hende ta cumpli cu e medidanan menciona.
Share this page