Minister Lampe ta haci apelacion na comercio pa yuda

Dit item is gearchiveerd op 15-02-2020.

ORANJESTAD - Minister di Enseñansa dr. Armando Rudy Lampe ta pidi cooperacion di comercio pa reparti digiboards na scolnan y yuda reconstrui klasnan na Scol Cacique Macuarima.

Diabierna 10 di januari Minister Lampe a haci un reparticion atrobe di digiboards na diferente scol publico. Un biaha mas a acerca comercio y un biaha mas e compania Arubano Italo Arubano, bou maneho di sr. Gregory Tromp a saca un man y a coopera cu e transporte. Minister Lampe ta agradeci cu esnan cu ta aporta cu enseñansa y ta sigui apela na otronan cu tambe kier yuda cu nan granito di arena.

Comercio  (e compania Arubano Italo Arubano), a saca un man y a coopera cu e transporte di e digiboards pa e scolnan.Falta algun digiboard mas pa entrega y lo sigui acerca comercio pa trata di haya e apoyo necesario cu falta. Tambe esnan cu tin e posibilidad pa yuda cu transporte, por tuma contacto cu oficina di Minister Lampe na 5284900 of cu Directie Onderwijs na 528-3400 y tuma contacto cu sr. Danny Maduro, pa por planea e logistica di e repartimento di e digiboardsnan cu falta ainda.

Minister Lampe ta lamenta enormemente e vandalismo cu a tuma luga na Scol Cacique Macuarima na Sta. Cruz. Por categorisa esaki como un crimen contra enseñansa. Minister Lampe ta apela na comercio tambe pa duna apoyo pa reanuda e lesnan lo mas pronto posibel door di yuda reconstrui e klasnan cu a destrui cu tambe mester ekipa tur e klasnan cu nan respectivo materialnan.

“Mi ta sigur cu comercio y mayornan lo sa di sostene e reconstruccion y ta spera cu algo asina aki, nunca mas ripiti”, Minister Lampe a expresa.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options