Molester di sangura despues di yobidanan pisa

Na Aruba nos tin e sanguranan Aedes Aegypti y Aedes Albopictus. Na ta portador di e virusnan cu ta causa dengue, zika y chicungunya.  Esun cu mas ta prevalece ta e sangura Aedes Aegypti.  Por reconoce ambos sangura (Aedes Aegypti y Aedes Albopictus) na nan pia cu ta color scur cu strepi blanco.

E otro sangura cu tambe ta causa masha hopi molester door di e cantidad di awacero den e ultimo simannan ta e tradicional sangura di cas, color preto yama Culex.

GKMB lo pasa controla tur rembak como medida preventivo como cu esakinan ta e luga ideal pa nan broei. Tambe, manera custumber lo nan bishita e areanan, instancianan y negoshinan di riesgo halto. Algun ehempel ta, casnan di anciano, scolnan, tireshopnan, dumpnan illegal, y santana.

Te ainda no tin un vacunacontra zika. Como tal prevencion ta e miho proteccion contra pika di sangura.

Cu esaki GKMB ta haci un apelacion na e comunidad Arubano pa activamente haci tur cos posibel pa elimina tur creadero di sangura.

1. Elimina depositonan di awa cu por sirbi como un luga pa sangura broei. Por ehempel : tairanan di auto, bleki, bari, hemchi, vaas, y bakinan.
2. Bisti paña cu ta tapa curpa. Por ehempel: Carson largo, paña cu manga largo, meya. Tambe uza colornan neutral como bruin of berde.
3. Ora di rumi uza e netnan contra sangura (mosketero)
4. Por spuit e mosketero cu insecticide.
5. Uza medionan contra sangura p.e. DEET
6. Tene sangura pafo di cas door di instala screen na porta y bentana.
7. Spuit sala y cambernan cu insecticida.