E ola tropical cu un area di presion riba Ocean Atlantico a desaroya su mes den un tormenta tropical. Matthew su centro di circulacion lo por pasa mas of menos na un distancia di 150 pa 200 km noord-noordoost di Aruba den curso di diahuebs laat pa diabierna.
E boletin ta valido te cu 6 or di atardi. Mirando e direccion di e sistema tropical por spera desde diahuebs te cu diadomingo, yobida fuerte compaña pa strena y lamper, biento modera te fuerte cu rafaga di biento (Beaufort 6 te 7, 22 te 33 nudo) y lama bruto banda di area di hotel.
Servicio Meteorologico (Meteo) a emiti un alerta di tormenta tropical (tropical storm watch) y lo monitor e sistema di cerca pa desaroyonan y lo informa pueblo via di boletin di noticia di e ultimo desaroyonan pa loke ta trata condicion y pronostico di tempo.
Instancianan di gobierno, manera Departamento di Obra Publico, Brandweer y Polis lo monitor e situacion pa duna ayudo en conexion cu inundacion den algun bario di e isla.
Ta urgi pueblo pa tene cuenta cu esaki y sigui boletinnan oficial di gobierno tocante tempo di cerca. Gobierno y Servicio Meteorologico Aruba ta den contacto cu servicio meteorologico den region, National Hurricane Center na Miami y e KNMI na Hulanda.
Share this page