Weganan di Rey 2017

Lo participa un total di 13700 muchanan y maestronan reparti den 67 scol y 560 klas.

“Instituto Bida Saludabel y Activo (IBISA)” a keda nombra door di e organisacion di Weganan di Rey na Hulanda como coordinador di actividadnan na Aruba.

E weganan di Rey 2017 ta un dia dibertido y alegre pa e muchanan di e scolnan basico na Hulanda y Islanan den Caribe.

E dia di deporte di Rey ta forma e curason di e weganan di rey y ta wordo acompaña door di un desayuno di Rey festivo.

E aña aki e lo wordo sirbi door di Jumbo di Hulanda y Superfood di Aruba.

Na e momento aki “Instituto Bida Saludabel y Activo (IBISA) ta ocupa den diferente preparacionnan manera training di e baile “Okido” di (kinderen voor kinderen) cu lo ta e cantica di Weganan d Rey.

E instructornan deportivo di IBISA, maestronan di Gym y boluntarionan ta guia y train e muchanan di tur e 67 scolnan participante cu e meta cu na cada scolnan basico e baile ta tuma luga riba 26 di april.

Despues tin un team di IBISA hunto cu Superfood ta ocupa na preparacion di e paketenan di desayuno.

Pa sigura cu tur cos lo caba bon, incluyendo e reparticion di e paketenan di desayuno, a organisa diferente encuentronan necesario, tanto interno y externo cu cabesantenan y representantenan di e scolnan.

Mientrastanto por bishita  e pagina di Facebook di IBISA tocante Weganan di Rey: www.facebook.com/weganan.reyaruba/.

Eynan bo por wak  e ultimo noticianan y tambe tur e actividadnan di añanan anterior.

E aña aki ta primiti di ta un dia saludabel, dibertido y deportivo pa e muchanan.