Zika ta hopi peligroso pa e hende muhe na estado

Principalmente e sangura Aedes Aegypti, cu ta e sangura cu ta transmiti entre otro Zika.

Un hende muhe na estado por transmiti e virus di Zika pa su baby den barica y un infeccion cu e virus di Zika por causa mal formacion di e feto cu por resulta den defectonan grave pa e baby (e.o microcephalia).

Tuma medida pa evita pica di sangura:

• Uza repelente di insecto cu ta contene 20 % – 30% di DEET 
• Trata di cubri bo curpa lo mas posibel door di uza blusa manga largo, carson largo y mea. Hinca blusa den carson y carson den mea pa miho proteccion.
• Uza condom durante di relacion sexual of abstene bo mes di relacion sexual: vaginal, anal y oral durante di bo embaraso. E virus di Zika por keda transmiti via relacion sexual. Ta comproba cu e virus di Zika ta keda na bida durante 6 luna den e semen di un hende homber afecta cu Zika.

Ta hopi importante pa tuma accion na cas tambe pa combati sangura:

• Tira bista den bo cas y cura pa criadero y elimina esakinan, manera baki bou di airco, scoter bou di pochi mata, y bleki riba suela. Percura pa semper e pos di bo cas ta bon tapa. No solamente cu tapadera, pero tambe gaas. Den e pos por tira contenido di un boter di kerosin pa evita cu e larvanan por desaroya y bira sangura of por uza mosquito donut. Un criadero por ta cualkier obheto cu ta contene awa, manera tire, bari, baki cuminda, hemchi y vaas di flor. Tira nan afo of bolter nan y tira e awa afo.  

Pa mas informacion tuma contacto cu Departamento di Gele Koort en Muskieten Bestrijding tel 5853325 of Departamento di Salud Publico na 5224200.